Joh 5 | ZomZIV | STEP | Tua nung a sawt loin Jew-te pawi sim dingin Jerusalem ah Jesu a paito hi.

John 5

Tuili ah Cina Damsak

1 Tua nung a sawt loin Jew-te pawi sim dingin Jerusalem ah Jesu a paito hi. 2 Jerusalem a, Tuu kongpi kici kiangah Aram pau-a Bethsaida ^{▼▼5.2 Khutgelh pawlkhatah Bethzatha; adangte khutgelhte ah Bethsaida} kici tuili khat a om hi. Tua tuili kimkotah talap nga a om hi. 3 Hih munah a lumden mittawte, khebaite, pumzawte, mipoi tampi a om uh hi. ^{▼▼5.3 Khutgelh pawlkhatah amaute in tui tat ding a ngak uh hi} 4 A hunhunin Topa vansawltak kumsukin tui va lok zelzel hi. Tua tui a tat ciangin a kidiah masa penpen a cinatna peuhpeuh a dam hi. ^{▼▼5.4 Khugelh pawlkhatah tg.4 na om lo hi} 5 Tuate lakah kum sawm-thum-le-giat sung a zawngkhal khat a om hi. 6 Jesu in tuapa mu-a, tua munah tua bangin sawtveipitak lum hi, cih thei-in a kiangah, “Na dam nuam hiam?” ci-in a dong hi. ^d

7 Tua mi zawngkhalpa in, “Sia aw, tui a tat ciangin, tui sungah hong diah ding kuamah ka nei kei hi. Kidiah dinga ka kithawi ciangin kei ma-ah midang khat na kidiah khin zel hi,” a ci hi.

8 Tua ciangin Jesu in ama kiangah, “Ding in, na phek la inla pai in,” a ci hi. 9 Tuapa thakhatin dampah-a a phek la-in a pai hi. ^e

Hih thupiang Sabbath ni khat ahi hi. 10 Tua ahitak ciangin Jew-te in a kidam sakpa kiangah “Sabbath ni ahi hi, thukham in phek na puak ding kham hi,” a ci uh hi. ^f

11 Ahi hangin amah in, “Kei hong damsakpa in ka kiangah, ‘Na phek la inla pai in,’ hong ci hi,” ci-in a dawng hi.

12 Tua ciangin amaute in, “‘Na phek la inla pai in,’ hong ci kua hiam?” ci-in a dong uh hi.

13 Tua lai-a om mihonte lakah Jesu lutmangpah ahi manin a cidampa in a damsakpa kua hiam, cih a thei kei hi.

14 Tua nung ciangin Jesu in amah biakinnpi ah mu a, “En in, na dam kik hi, mawhna na bawl nawn kei in, tua hikeileh nang tungah a siazaw hong tung kha ding hi,” a ci hi. 15 Tua mipa paikhia-a, Jew-te kiangah amah a damsakpa Jesu ahilam a gen hi. ^g

Tapa Tungtawna Nuntakna

16 Tua ciangin Jesu in hih nate Sabbath ni-a sem ahi manin Jew-te in amah a bawlsia uh hi. 17 Jesu in amaute kiangah, “Ka pa in tuni mahmah dongin na sem tawntunga, kei zong ka sem hi,” a ci hi. 18 Jesu in Sabbath ni a tan loh man bek hi loin Pasian nangawn ama Pa a cihna hang le Pasian tawh a kikim-a a kikoihna thute hangin Jew-te in amah thah ding a hanciam semsem uh hi. ^h

19 Jesu in amaute hih in a dawng hi: “Thutak kong geninah, Tapa in amah guakin bangmah a hih thei kei hi; a Pa hih a muhsate bek hih thei hi. Bang hang hiam cih leh, Pa hih peuhpeuh Tapa in zong a hih hi. 20 Ahang in, Pa in Tapa it-a a hih khempeuh amah a lak hi. Himah hi, lamdang na sak dingun hihte sanga a lamdangzaw nangawn a lak lai ding hi. 21 Ahang in, Pa in misite nuntakna pia-in a thawhkiksak bangin Tapa in zong a piak nop mite tungah nuntakna a pia hi. 22 Tua banah, Pa in kuama tungah thu a khen kei hi, ahi hangin thukhenna khempeuh Tapa tungah a ap hi; 23 tua pen mi khempeuh in Pa a pahtawi bangin Tapa a pahtawi nading uh ahi hi. Tapa a pahtawi lote in amah a sawlpa, Pa pahtawi lo ahi hi. ⁱ

24 “Thutak kong geninah, ka thugen za a, kei hong sawlpa a um peuh in nuntak tawntungna a nei hi; a kimawhpaih kei ding hi. Amah in sihna kantanin nuntakna ah tung zo hi. 25 Thutak kong geninah, misite in Pasian Tapa aw a zak hun hong tung dinga, tu-in zong hong tung zo hi; a zate a nungta ding hi. 26 Ahang in, Pa in amah mah-a nuntakna a neih bangin Tapa in zong amah mah-a nuntakna a neih nadingin a pia zo hi. 27 Amah Mihing Tapa ahi manin thukhen nading thuneihna amah in pia zo hi. ^j

28 “Hih thu lamdang sa kei un, ahang in, amau han sunga omte in ama aw za in, 29 hong paikhiat hun hong tung dinga, a hoih a nasemte a nungta dingin tho ding uh hi. A tatsiate kimawhpaih dingin tho ding uh hi. 30 Kei thu guakin bangmah ka hih thei kei hi. Ka zak bangin thu ka khen hi.Tua ahi ciangin ka thukhenna atang hi. Ahang in, kei lungkim nading zong loin kei hong sawlpa lungkimna ka zong zaw hi. ^k

Jesu Thu Teci Pannate

31 “Kei thu ah kei le kei teci kipang leng, ka teci panna a kip kei ding hi. 32 Kei hong angvan teci pang midang khat om hi, kei thu teci panna a kip hi, cih ka thei hi.

33 “Note in John kiangah na kansak zo uh hi. Amah in thutak teci a pang hi. 34 Mihing teci panna ka sang hi, ka cihna hi loin note in hotkhiatna na ngah theih nadingun ka gen hizaw hi. 35 John pen meivak hi-a a kuang in khua a vaksak hi. Ama khuavak ah hun khat sung nopsak ding na teel uh hi. ^l

36 “John teci panna sanga thugik zaw ka nei hi. Ahang in, Pa in zawh khit dinga hong piak tua ka nasep pen Pa in kei hong sawl ahina teci ahi hi. 37 Kei hong sawlpa Pa mahmah in kei tawh kisai teci a pang hi. Note in a aw na za ngei kei uh a, a mel zong na mu ngei kei uh hi. 38 Ama sawlpa um lo na hi manun a thu zong note sungah a teng kei hi. 39 Laisiangtho simna hangin nuntak tawntungna a kinei sa na hi manun limtakin na sin ^{▼▼5.39 Ahikeh sim cih takin sim (sawl manna)} uh hi. Hih Laisiangtho, kei thu teci pang ahi hi. 40 Tua hi napi nuntakna ngah dingin kei kiangah nong pai nuam kei uh hi. ⁿ

41 “Mite hong phatna ka sang kei hi. 42 Ahi hangin note kong thei hi. Note lungsungah Pasian itna na neih loh uh ka thei hi. 43 Ka Pa minin kong pai-a, note in nong sang kei uh hi. Ahi hangin midang khat ama minin hong pai leh, amah na sang ding uh hi. 44 Note khat le khat kiphatna kisangin, Pasian khat bek ^{▼▼5.44 Khutgelh masa pawlkhatah Khat Bek} hong phatna ngah ding na sawm kei uh leh bangci up thei ding na hi uh hiam? ^p

45 “Ahi hangin Pa mai-ah note hong mawhsak dingin hong ngaihsun kei un. Note hong mawhsak, na lametna uh a kingakna pa Moses ahi hi. 46 Moses in kei thu gelh zo ahi manin amah na up uh leh kei zong nong up ding uh ahi hi. 47 Ahi zongin ama gelhsate na up loh nung sangun kei gente bangci up thei ding na hi uh hiam?” a ci hi. ^q